Во своето обраќање пред присутните, претседателот Фидани го потенцираше значењето на оваа меѓународна конференција, која ги обединува претседателите на врховните судови во светот, за да се дискутира за најегзистенцијалните и најдлабоките предизвици со кои се соочува човештвото: насилство и војна, климатските промени и проблемите што произлегуваат од научниот и технолошкиот напредок.

Претседателот Фидани посебно ја истакна важноста на улогата на врховните судови, кои преку својата практика ги заштитуваат вредностите и стандардите утврдени во меѓународните конвенции и домашното законодавство, унапредувајќи ги притоа човековите права, владеењето на правото и демократијата.

Во фокусот на дискусијата на меѓународната конференција, која традиционално се одржува секоја година и на која учество земаа претседатели на врховни судови, судии, истакнати правници и промотори на мир од 52 земји, беше повелбата на Обединетите нации и потребата за креирање на праведен, одржлив и демократски систем на управување со меѓународните прашања. 

Конференцијата се заснова на убедувањето дека овие предизвици можат да се решат ефикасно само преку силно меѓународно право и реформирано глобално управување што промовираат единство, соработка, одржлив мир и развој и безбедна иднина за човештвото, особено за децата и идните генерации.