Во организација на Здружението на судии на Република Северна Македонија на 30.04.2025 година се одржа Годишната судиска конференција на тема „Зајакнување на судската независност и одговорност преку поголема ефикасност на постапката“, на која се обрати и учествуваше ВД Претседателот на Врховниот суд на Република Северна Македонија, д- р Џемали Саити.

    ВД Претседателот говореше на панелот - Самостојност и независност на судската власт на тема: „Како до поголема финансиска и институционална стабилност”.

    Во воведното обраќање, ВД Претседателот Саити ги истакна достигнувањата на оваа Конференција, која низ овие години овозможи широка дебата и придонесе во донесувањето на бројни и важни одлуки со цел креирање на независен и кредибилен правосуден систем.

   Во продолжение, ВД Претседателот нотираше дека независен судски систем подразбира етаблирани институции, финансиска одржливост, ефикасност и фер право раздавање, притоа за остварување на оваа цел, ја истакна потребата од институционална кохабитација на трите власти, заснована на универзалните принципи на владеењето на правото и демократските вредности.

   Во остварувањето на оваа цел, примарна е улогата на Судскиот совет и Врховниот суд на Република Северна Македонија, како двигатели на овој процес, манифестирајќи лидерство и визија, која ќе ја обезбеди автономијата на судската власт и нејзината видливост.

   Во овој контекст, Врховниот суд на Република Северна Македонија презема низа активности во насока на стандардизација на примената на правото и особено активности за заштитата на човековите слободи и права, преку донесување на бројни правни мислења и начелни ставови.

  За постигнување на оваа цел, не помалку важна е улогата на Здружението на судии на Република Северна Македонија, како институција со висок интелектуален потенцијал, која низ изминатите години покажа иницијативност и реална партиципативност во судските работи.